Javnstøðubrillur - nýtt poddvarp um javnstøðu

 
1.png
 

Hvussu sær eitt nú søga, arkitekturur, retorikkur, list, matgerð, heilsa, útbúgving ella fiskivinna út við javnstøðubrillum? Sær verðin øðrvisi út? Fáa vit eyga á okkurt, sum vit vanliga ikki síggja? Hetta er tátturin í nýggja poddvarpinum hjá Javnstøðunevndini og Demokratia. 

Í poddvarpinum fara serfrøðingar, viðmerkjarar og onnur saman við skiftandi vertum at umrøða viðkomandi evni og spurningar. Endamálið er at varpa ljós á týdningin av javnstøðu í breiðasta týdningi á ein lættan og øðrvísi hátt og eisini at fáa kanska óvæntað sjónarmið fram.

"Okkara uppgáva er at síggja verðina við javnstøðubrillum, og tað gera vit allatíð. Við nýggja poddvarpinum vilja vit bjóða lurtaranum møguleikan at síggja verðina við okkara brillum - eina løtu saman við áhugaverdum gestum og vertum," sigur Lív Paturson, skrivari hjá Javnstøðunevndini og Demokratia.

“Yvir høvur er arbeiðið hjá Javnstøðunevndini ikki altíð so sjónligt hjá almenninginum. Vit virkað mest “backstage” og viðgera klagur og vegleiða stovnum, virkjum og einstaklingum. Og ofta hoyra fólk bara um okkum, tá ið okkurt er galið við javnstøðuni. Ynskið hjá javnstøðunevndini er at varpa ljós á javnstøðu á ein nýggjan og øðrvísi hátt og er nýggja poddvarpið ein liður í hesum,” sigur Mai Laksafoss, forkvinna í Javnstøðunevndini

Í fyrstu fýra poddunum fara kendir serfrøðingar at umrøða hvør sítt evnið við nýpussaðum brillum. Fyrsti gesturin er Hans Andrias Sølvará, søgufrøðingur, sum saman við vertinum Óluvu Zachariasen hyggur at søgu í javnstøðubrillum: Hvønn leiklut hevur kyn í okkara søgu? Hvørjar søgur verða fortaldar, og hvørjar eru fjaldar? Hevði Føroyingasøga sæð øðrvísi út, um ein kvinna skrivaði hana? Og hvønn týdning hevur søguskrivingin fyri okkara samleika sum fólk og kyn?

Tað eru Javnstøðunevndin og Demokratia, sum hava tikið stig til nýggja poddvarpið, sum kann hoyrast her: 

https://spoti.fi/3zvNOgs

https://javnstodubrillur.buzzsprout.com/

https://www.javnstoda.fo/

 

 

Allan Dalsgarð